ఇంతులు - ఈవ్ టీజింగ్

అసలు ఈ ఈవ్ టీజింగ్ అనేది ఒక అలవాటో, మానసిక దౌర్భల్యమో అర్ధం కాదు. కొందరు అబ్బాయిలు, మగాళ్ళు అమ్మాయిలను కామెంట్ చేయడం, తాకాలని ప్రయత్నించడం. శృతి మించితే అసభ్య , అశ్లీల వేధింపులు.. ఇలా చదువుకునే అమ్మాయిలు, ఉద్యోగం చేయడానికి వెళ్ళే స్త్రీలు ఈ సమస్యను ఎదుర్కోక తప్పడంలేదు. అబ్బాయిలకు అదొక పైశాచిక ఆనందం, అమ్మయిలకు ఒక గండం. ఇది ఎలా ఎదుర్కోవాలనే చిట్కాలు ఉన్నా అవి అన్ని చోట్లా అన్ని వేళలా పనికి రావు. వాటిని చూసి చూడనట్టు వదిలేస్తే ఎక్కువ కావొచ్చు. లేదా వాగి వాగి ఊరుకోవచ్చు, ఎదురు తిరిగి జవాబిస్తే , ప్రతీకారంగా ఇంకా ఏదైనా చేయొచ్చు. మరి దీనికి పరిష్కారం లేదా? ఎప్పుడు పోలీసులు వచ్చి రక్షించేదాకా ఆగాలా? వాళ్ళు మాత్రం సకాలంలో స్పందిస్తారనే నమ్మకముందా?. ఇప్పుడు దాదాపు అన్ని కాలేజీలలో ర్యాగింగ్ ప్రక్రియను నిరోధించడానికి చర్యలు తీసుకుంటున్నారు. ఐనా బయట జరిగే వాటినెలా ఎదుర్కోవడం?

ఈ సమస్య ఇప్పటిది అని చెప్పలేము. నేను కాలేజిలో చదువుకునేటప్పుడు కూడా చూసాను. ఇంటినుండి బస్ స్టాప్ కెళ్ళేవరకు బిక్కు బిక్కు మంటూ వెళ్ళడం. మెయిన్ రోడ్ ఐతే ఏం కాదు. . సందులు గట్రా ఐతే టెన్షన్ తప్పదు. నాకు ఇంటర్‍లో చదువుతుండగా ఇలాగే జరిగింది. ఒకతను రోజు మేము ఎక్కే బస్ లో వచ్చేవాడు. మా స్నేహితులమందరం నిలబడి ఏదో మాట్లాడుకుంటుండగా పక్కకు వచ్చి తాకుతూ నిలబడడం. ఎన్ని సార్లు తప్పుకుని ముందుకు జరిగినా అతను వచ్చేవాడు. మూడు రోజులు చూసా. అసలే ఆ రోజు పరీక్ష ఉండింది. ఇదో సమస్య. అంతే నా ఓణీ కి ఉన్న పిన్నీసును తీసి, నా పక్కన తాకుతూ నిలబడ్డ అతని చేయికి కసితీరా గుచ్చా. అంత తిక్క రేగింది నాకు. మళ్ళీ కనపడితే ఒట్టు. రష్ లో ఉంటే ఇలా చేస్తే ఎవరికి తెలియదు అనుకుంటారు యెదవలు. ఇలాంటి చదువుకున్నవాళ్ళే కాదు, చదువురాని , పని చేసుకునేవాళ్ళు కూడా ఆడవాళ్ళను ఏదో విధంగా సతాయించాలని చూస్తారు. ఒకసారి మా అమ్మాయిని తీసుకుని షాప్ కెళ్తున్నా , తనకేవో బుక్స్ కావాలంటే. అంతకుముందే బాగా వర్షమొచ్చి, రోడ్డంతా నీరు నిలిచింది. సో ఫుట్‍పాత్ మీద నడుస్తున్నారు అందరు. ఒకతను బుట్టలో ఏదో అమ్ముకునేవి పెట్టుకుని నాకు ఎదురుగా వస్తున్నాడు. కాస్త పక్కకు జరిగి నడవకుండా కావాలని నన్ను నీళ్ళలో పడేలాచేయాలని నేరుగా వస్తున్నాడు. అది తెలుసుకుని నేను సరిగ్గా వాడికెదురుగ్గా నడిచా మా అమ్మాయి చేయిపట్టుకుని . ఇది వాడు ఊహించలేదు. కాస్తలో తలమీద బుట్టతో సహా నీటిగుంటలో పడబోయి ఆగిపోయాడు.

.

మహేష్ చెప్పినట్టు ఇలా చేసేవాళ్ళు మానసిక రోగులు. ఆడవాళ్ళను కామెంట్ చేయడం ( అది వారి స్వభావాన్ని బట్టి వివిధ రీతుల్లో ఉంటుంది) అలా చేయడం వల్ల పైశాచికానందం పొందుతారు. సున్నితమనస్కులైన అమ్మాయిలు ఎంత బాధ పడతారు అనేది వాళ్ళకు పట్టదు. వాళ్ళు బాధ పడుతుంటే ఈ మగ పురుగులకు ఆనందంగా, సంతృప్తిగా ఉంటుంది. అదే వాళ్ళ చెల్లెలికో,అక్కకు జరిగితే అనే ఆలోచన కూడా రాదు అనుకుంటా. సరదాగా ఉంటే ఇది సమస్య కాదు. కాని అది తీవ్రంగా ఉంటే మాత్రం ఉపేక్షించి లాభం లేదు.

ఈ 'ఈవ్ టీజింగ్' ని ఎదుర్కోవడానికి నా పరంగా కొన్ని సలహాలు అమ్మాయిలకు..

సరదాగా ఉంటే చిరునవ్వుతో వదిలేయండి. పట్టించుకోవద్దు. పట్టించుకుని బాధపడ్డారో, గొడవ చేసారో. అనవసరంగా సమయం వృధా. అలా కాకుండా అది అభ్యంతరకరంగా, తీవ్రంగా ఉంటే ఎదుర్కోండి. కాని ఒంటరిగా కాదు. ఇది మీకు ప్రమాదం. ఆ వ్యక్తి పగబట్టి హాని కలిగించవచ్చు. మీ తోటి స్నేహితులకు, లేదా కాలేజీ విద్యార్థి సంఘాన్ని సంప్రదించండి. అమ్మాయిలు , అబ్బాయిలు కలిసి ఈవ్ టీజింగ్ చేసే వాళ్ళను నిలదీయండి మర్యాదగానే. వినకుండా తిక్క వేషాలేస్తే ఉతికేయండి అందరు కలిసి. లేదా అతనిని పట్టుకుని వాళ్ళ ఇంటికి వెళ్ళి అతని కుటుంబ సభ్యులతో , ముఖ్యంగా అతని తల్లితో ఇదీ సంగతి అని చెప్పండి. ఇంత డ్రామా అవసరమా అనుకోవచ్చు. ఒకరోజు , రెండు రోజులైతే ఏం కాదు. కాని కాలేజికి వెళ్ళే అమ్మాయిలకు బస్ స్టాపులలో, బస్సుల్లో రోజూ ఇలాంటి వాళ్ళు తగుల్తారు. అలా ప్రతి రోజు భయపడుతూ వెళ్ళాలా?. పోలీసులకు చెప్పి లాభం లేదు. ఈ సమస్యను మీరే ఎదుర్కోండి. అందరు అమ్మాయిలు కలిసి ఆ అబ్బాయిని బస్ స్టాపులోనే పట్టుకుని అన్నా అని రాఖీలు కట్టండి నడిరోడ్డు మీదే అందరి మధ్య. కాని ఎప్పుడు ఒంటరిగా తిరగొద్దు. మెయిన్ రోడ్ ఐతే పర్వాలేదు కాని సందుల్లో, నిర్మానుష్యంగా ఉండే రోడ్లపై వెళ్ళేటప్పుడు జాగ్రత్తగా ఉండాలి. తప్పదు. కొందరు పిరికినాయాళ్ళు బైకులమీద వెలుతూ ఒంటరిగా అమ్మాయి వెళుతుంటే వీపుమీద చరిచి స్పీడుగా వెళ్ళిపోతారు. పట్టుకోవాలన్నా, తిట్టాలన్నా కనుచూపు మేరలో కనపడరు. ఫోన్ నంబర్లతో జాగ్రత్తగా ఉండండి. నంబర్లు తెలుసుకుని సతాయించేవాళ్ళు ఎందరో. ఒకసారి హైదరాబాదులోనే ఇలాంటి సంఘటన జరిగింది. హాస్టల్లో ఉండి చదువుకుంటున్న అమ్మాయి సెల్ నంబరు తెలుసుకున్న ఒక వ్యక్తి ఊరికే కాల్ చేసి పిచ్చి పిచ్చిగా వాగేవాడు. తిట్టినా, మెల్లిగా చెప్పినా వినలేదు. ఊర్లో ఉన్న తల్లితండ్రులకు చెప్తే చదువు మానిపించేస్తారని అమ్మాయి భయం. ఒకసారి ఆ వ్యక్తి తనను పెళ్ళి చేసుకోమని వేధించసాగాడు. అప్పుడా అమ్మాయి తన స్నేహితులకు చెప్పింది. అందరు కలిసి ఆ వ్యక్తిని ఉస్మానియా యూనివర్సిటీ గార్డెన్ కు రమ్మన్నారు. అతను వచ్చాక అందరు కలిసి బాగా తన్ని పోలీసులకు అప్పగించారు. ఇందులో ఆ అమ్మాయి క్లాస్‌మేట్స్ ఐన అబ్బాయిలు కూడ ఉన్నారు.

ముఖ్యంగా అమ్మాయిలు ఇది గుర్తుంచుకోండి.. చదువుకోసమైనా, ఉద్యోగం కోసమైనా మీరు బయట కాలు పెట్టినప్పుడు ,ఈ రోజుల్లో పిరికితనం, నిస్సహాయత పనికిరాదు. ఎప్పుడైనా కాని ధైర్యంగా ఉండండి. మీలోని ఆత్మవిశ్వాసం మీ నడకలో ,ప్రవర్తనలో కనిపించాలి. తప్పు చేయనప్పుడు ఎవరి మాట పడాల్సిన అవసరం లేదు. Be Brave and confident of urself ..