Friday, April 29, 2011

మనల్ని మనం అర్పించుకుందాం - కంప్యూటర్ ఎరా తెలుగు మేగజైన్ మే 2011 ఎడిటోరియల్

అణుకువగా ఒదిగి ఉండడంలో ఉన్నంత సంతృప్తి మరెక్కడా కానరాదు.. ముఖ్యంగా స్వచ్ఛమైన ప్రేమ ముందూ, మానవత్వం నరనరానా తొణికిసలాడే మనుషుల ముందూ ప్రణమిల్లాలన్పిస్తుంది తప్ప దర్పం ఒలకబోయబుద్ధి కాదు. ప్రతిఫలాపేక్ష లేకుండా మన శ్రేయస్సుకై తపనపడే ఆత్మీయుల రుణం ఏ విధంగా తీర్చుకోగలం.. మనల్ని మనం మానసికంగా అర్పించుకోవడం తప్ప? మన మొహంలో వెలుగుని చూసి సంబరపడిపోయే ఆత్మీయమూర్తుల్ని ఏమని విశ్లేషించగలం.. విశ్లేషణని కట్టిపెట్టి మనసుతో స్పృశించకుండా! మనకు తెలియకుండానే మనం సురక్షితమైన హస్తాల్లో రక్షించబడి ఉంటున్నాం. ఎందరో బంధువులూ, స్నేహితులూ మన శ్రేయస్సుని మనసారా కాంక్షిస్తున్నారు కాబట్టే మనం దిగ్విజయంగా జీవించగలుగుతున్నాం. ఏవో ఉరుకులు పరుగుల్లో క్షణం కూడా ఆలోచించే తీరిక లేకపోవడం వల్ల మన చుట్టూ పెనవేసుకుపోయిన అద్భుతమైన అనుబంధాలను మనం గ్రహించలేకపోతున్నాం. కొండొకచో గ్రహించగలిగినా మనం ఆదరణని కోరుకునేది కొందరి వద్దయితే.. ఆ ఆదరణ లభించేది మరికొందరి వద్ద కావడం వల్ల మనసారా స్వీకరించలేక ఆదరించే వారినే చిన్నచూపు చూస్తున్నాం.

ప్రేమ, ఆదరణ విశ్వజనీయమైనవి. మనం అందమైన రూపాల్లోనో, వ్యాపారాత్మక బంధాల్లోనో వాటిని వెదుక్కునంత కాలం నిరుత్సాహమే మిగులుతుంది. బోసి నవ్వుతో మనసారా పలకరించే ముసలవ్వని అరక్షణం తీక్షణంగా గమనిస్తే ఎంతటి ఆత్మీయత ఆ నవ్వులో ఉట్టిపడుతోందో అర్థమవ్వదూ..? ఎందరో మనపై దిగుళ్లు పెట్టుకుంటూ ఉంటారు.. దిగులుపడడం వారి తప్పన్నట్లు కసురుకుని చిన్నబుచ్చుతాం గానీ మన గురించి అంతగా ఆలోచించే మనుషులు ఉన్నందుకు ఒక్క క్షణమైనా వారిని హృదయానికి హత్తుకోగలుగుతున్నామా? ప్రతీ మనిషిలోనూ భగవంతుడు సున్నితత్వాన్నీ మేళవించాడు. మనం భ్రమిస్తున్నట్లు ప్రపంచం మొత్తం అన్యాయాలూ, అక్రమాలూ, ద్వేషాలూ, పగలూ, ఈర్ష్యాసూయలు నిండిపోలేదు. మనుషులం మనమే సమాజంలోని సుగుణాల్ని చెప్పుకుంటూ సంతోషంగా బ్రతకడం మానేసి ఏ మూలనో ఇరుక్కుని బ్రతికేలా అభద్రతను మూటగట్టుకుంటున్నాం. పక్క మనిషి యొక్క స్వచ్ఛమైన నవ్వుని ఆస్వాదించలేకపోతున్నామంటే.. ఇంకా మనుషులు మన హృదయాలకు చేరువయ్యేదెప్పుడు? నిశితంగా గమనిస్తే ప్రతీ క్షణమూ మనకు అద్భుతంగా మలచబడి ఉంటుంది.. ఆ క్షణాన్ని సదా మన శ్రేయస్సుని కాంక్షించే ఆత్మీయుల మనోఃబలంతో ఆస్వాదించగలుగుతున్నామా లేక మనల్ని ఒక్కర్నే ప్రపంచంలో ఒంటరిని చేసుకుని ఏకాకిగా ఎదుర్కోవడానికి పోరాడుతున్నామా అన్న దాని మీదే మనం అనుభవాలు ఆధారపడి ఉంటాయి. ఒక్కటి మాత్రం నిజం.. తమకు ఎలాంటి ప్రయోజనం లేకపోయినా.. మనల్ని మనగా అభిమానిస్తూ తమ ఆశీర్వచనాలు నిరంతరం అందజేసే దైవస్వరూపులైన ఆత్మీయులు మనతో ఉన్నంతకాలం, వారికి మనం మనసారా అర్పించుకోగలిగినంత కాలం మనం చాలా సురక్షితంగా ఉంటాం. మనం చేయవలసిందల్లా అటువంటి ఆత్మీయుల్ని మనసుకి దగ్గరగా తీసుకోవడమే!

మీ
నల్లమోతు శ్రీధర్

Wednesday, April 27, 2011

కంప్యూటర్లో చందమామ



కంప్యూటర్లో చందమామ


తోకచుక్క, మకర దేవత, ముగ్గురు మాంత్రికులు, విచిత్ర కవలలు, రూపధరుడి యాత్రలు, రాకాసి లోయ, పాతాళ దుర్గం, రాతి రథం, యక్ష పర్వతం .. ఈ పేర్లు చూస్తుంటే మీకేమైనా గుర్తొస్తుందా?? అందమైన చిత్రాలతో, ఆసక్తికరమైన కథనంతో, సరళమైన బాషతో చిన్నాపెద్దా తేడా లేకుండా ప్రతీ నెలా ఎదురుచూసేలా చేసే చందమామ కథలు ఇవి. మన తెలుగుబాషలోనే కాక భారతదేశంలోని పద్నాలుగు భాషలలో ప్రచురింపబడుతున్న చందమామ పత్రిక ఎంతోమంది బాల్యస్మృతులలో నేటికి సజీవంగా ఉంది అని చెప్పడం అతిశయోక్తి కాదు. ఆరు దశాబ్దాల క్రితం పిల్లల పత్రికగా మొదలైన చందమామను ప్రస్తుతం 70, 80 ఏళ్ల పైబడిన వారు ఇప్పటికీ కొని చదువుతూ తమ మనవళ్లు, మనవరాళ్లకు వాటిని చదివి వినిపిస్తున్నారు. ఈరోజు పిల్లలను రాముడు, శూర్పణఖ, భేతాలుడు ఎవరు అని అడిగితే తెల్లమొహం వేస్తారు. అదే స్పైడర్ మాన్, పవర్ రేంజర్స్, బ్యాట్ మాన్ , హ్యారి పోటర్ గురించి అడిగితే ఒక్క లైన్ పొల్లుపోకుండా చెప్పేస్తారు.అవే వింతలు, అద్భుతాలు, మనమూ చిన్నప్పుడే చదివేసాం అంటే నమ్ముతారా?? నమ్మరు.కాని చందమామ పత్రికలో మనం నేర్చుకున్న కథలు, పురాణాలు, జాతక కథలు మర్చిపోగలమా? పుస్తకం రాగానే ఇంట్లో ఎవరు ముందు చేజిక్కించుకుంటారా అని గొడవ జరగని ఇల్లు లేదంటే అతిశయోక్తి కాదేమో? కాని ఇప్పటి తరానికి తమ చదువులకే సమయం సరిపోవడం లేదు. ఇక చందమామలాంటి పత్రికలు ఎప్పుడు కొని చదువుతారు? కాని కంప్యూటర్ ఇంట్లో ఉన్నప్పుడు ఆ చందమామ పత్రిక కూడా చాలా సులువుగా చదువుకోవచ్చు. అలనాటి కథలు , సీరియల్లు కూడా చదవడానికి అందుబాటులో ఉంచారు కొందరు చందమామ ప్రియులు. చంపి (ఎంపి కి పోటీగా, అంతకన్నా ఇంకా గౌరవప్రదంగా పేరు వెనుక తగిలించుకోదగిన బిరుదు) చంపి అంటే చందమామ పిచ్చోళ్లు అని తమకు తామే గర్వంగా చెప్పుకుంటున్నారు.



క్రమంలోనే చందమామ కోసం ఒక వెబ్ సైట్ (http://www.chandamama.com/) కూడా నిర్వహించబడుతుంది. అందులో చందమామ పత్రికకు సంబంధించిన వ్యక్తుల అనుభవాలు, అప్పటి రాతలు, చిత్రాలు, చందమామ పాఠకులు తమ జీవితంతో పెనవేసుకున్న పత్రిక ముచ్చట్లను కూడా పంచుకుంటున్నారు. పాత చందమామ పత్రికలు, ధారావాహికలను ఎవరైనా సులువుగా డౌన్లోడ్ చేసుకునేలా అందుబాటులో ఉంచారు. 1947 నుంచీ 2006 దాకా చందమామలు అన్నీ ఇంటర్నెట్ లైబ్రరీ లో ఉన్నాయి. చిన్నప్పుడు ఎన్నోసార్లు చదివిన పుస్తకాలు, బొమ్మలు, అడ్వర్టయిజ్మెంట్లతో సహా ఇప్పటికీ చాలామంది కళ్ళముందు ఉన్నాయి. అవే పుస్తకాలు మళ్ళీ ఇప్పుడు నెట్‌లో చూసుకుంటుంటే ఒక నోస్టాల్జియాతప్పకుండా ఆవహిస్తుంది. మరికొన్ని పాత చందమామ కథలు. సీరియళ్లను శివరామప్రసాద్ గారు ఇక్కడ తన బ్లాగులో కూడా అందిస్తున్నారు.. http://saahitya-abhimaani.blogspot.com/

Monday, April 25, 2011

వేమన వీరబ్రహ్మం





















సమాజంలోని లోటుపాట్లు, తప్పులను ఎత్తిచూపుతూ నిరర్ధకమైన కార్యములను నిరసించి దివ్యప్రబోదాలు చేసిన ఇద్దరు మహనీయులు వేమన, వీరబ్రహ్మం గురించిన వ్యాసం మాలిక పత్రికలో

Saturday, April 23, 2011

తెలుగుకు పట్టిన తెగులు


ఈ ప్రకటన ఇక్కడ ఎందుకుంది అంటారా?? కాస్త పై చిత్రంలో తేడాగా ఏదైనా కనిపిస్తుందా చూడండి. ఎవరికైనా ఈ కంపెనీ వాడి మార్కెటింగ్ శాఖ నంబర్ ఉంటే మాట్లాడండి. లేదా కనుక్కోండి. వాడి సంగతి తేలుద్దాం. నాకైతే వాడిని తన్నాలనిపిస్తుంది. ఈ ప్రకటన ఎక్కడ కనిపించింది అంటారా??.. ఇది చూడండి.

హమ్మయ్యా! ఎలాగైతేనేమి ఈ ప్రకటనలో తెలుగును సరిదిద్దారు.. ఇక్కడ చూడండి..

Wednesday, April 20, 2011

పద్యం...




http://padyam.net


పద్యం...

పద్యాలనే గుఱ్ఱాలు పత్రికలలోనే కాక అంతర్జాలంలో కూడా వేగంగా పరుగులెత్తుతున్నాయి. అంతర్జాల పత్రికలలో పద్యాలకై ప్రత్యేక శీర్షికలు, పండగవేళల్లో భువనవిజయ సభలు ఎంతో ఆదరణ పొందుతున్నాయి. అదేవిధంగా పద్య సంబందిత బ్లాగులు కూడా వృద్ది చెందుతున్నాయి. పద్యాలు రాయడమే కాదు, ఔత్సాహికుల కోసం పద్యరచన గురించి సులభమైన రీతిలో వివరిస్తున్నారు. ఈ పరిణామాల దృష్ట్యా అంతర్జాలంలో పద్యాలకై ఒక ప్రత్యెకమైన ఆవరణ ఎర్పాటు చేసారు. అదే "పద్యం".

అంతర్జాలానికి కొత్తగా వచ్చిన పద్యప్రియులకి, ఇక్కడున్న పద్యసంపద గురించి వీలైనంత సమగ్ర సమాచారం అందించడం.ఇప్పటికే అంతర్జాలంలో వివిధ రూపాల్లో ఉన్న పద్యసాహిత్యాన్ని యూనీకోడీకరించడం అనేది పద్యం వెబ్ సైటు ప్రధాన ఉద్ధేశ్యం. ప్రస్తుతానికి దీని పరిధి చాలా పరిమితం. అక్కడక్కడా పరచుకుని ఉన్న వివిధ వెబ్ సైట్లలో ఉన్న పద్యాలని, ఆయా ఓనర్ల అనుమతితో, యూనికోడులోకి తర్జుమా చెయ్యడమే ప్రస్తుతానికి వారు చేస్తున్న పని. అంతర్జాలంలో లేని, కాపీరైట్ల సమస్య లేని పద్యసాహిత్యాన్ని యూనీకోడులో ఇక్కడ భద్రపరచడం. కొత్తగా పద్యాలు రాసేవాళ్ళకి తగిన సూచనలిచ్చి ప్రోత్సహించడం అనే ఉద్ధేశ్యంతో ఈ వేదిక ప్రారభించబడి, విజయవంతంగా ముందుకు సాగిపోతుంది.


ప్రస్తుతానికి ఈ సైటులోని విభాగాలు ఇవి:


1. ఛందః మంజూష ఇది ఛందస్సు గురించిన సమాచార సమాహారం. పైన చెప్పినట్లు, ప్రాథమిక సమాచారానికి ఇక్కడనుంచి వికీకి లంకెలుంటాయి. ఛందస్సు గురించిన ప్రత్యేక విషయాలేమైనా వ్యాసాల రూపంలో ఇక్కడుంటాయి.


2. పద్య మంజూష - పద్య సాహిత్య సమాహారం. కాపీరైటులేని ప్రాచీన ఆధునిక పద్య కవిత్వం ఇక్కడ చదవవచ్చు.


3. వ్యాస మంజూష - పద్య సాహిత్యం గురించిన పరిచయ, సమీక్ష, విమర్శ వ్యాసాల సమాహారం ఇది.


4. పద్యాలతో కసరత్తు అంతర్జాలంలో పద్యకవులు పాల్గొనేలా రెండువారాల కొకసారి ఒక సమస్యాపూరణమో, దత్తపదో, వర్ణనో, అనువాదమో ఇవ్వబడుతుంది.


పైవన్నీ బ్లాగు టపాల రూపంలో ఉంటాయి. ఇవి కాక ఈ సైటులో ఉండే మరో రెండు అంశాలు:


1. బ్లాగు మంజూష ఇది పద్య సంబంధి బ్లాగుల సమాహారం.


2. చర్చా వేదిక - ఈ సైటు గురించి కాని, ఛందస్సు గురించి కాని, పద్యాల గురించి కాని పాఠకులు చర్చించేందుకు ఇది వేదిక.


Wednesday, April 13, 2011

సాహితీ ప్రాంగణాలు



సాహితీ ప్రాంగణాలు


సమస్తం ఆంగ్లమయమైన ఈ రోజుల్లో తెలుగు నేర్చుకోవడానికి, చదవడానికి చాలామంది అనాసక్తిగా ఉన్నారు. అదేమంటే చదువు, ఉద్యోగాలకు సంబంధించిన సమస్త సమాచారం ఆంగ్లంలో ఉన్నప్పుడు తెలుగు మనని ఏవిధంగా ఉద్ధరిస్తుంది అంటారు. కాని సాంకేతికంగా శరవేగంతో అభివృద్ధి చెందుతున్న ఈ సమయంలో కొందరు తెలుగు భాషాభిమానులు ప్రాచీన సంస్కృతిని, విజ్ఞానాన్ని అంతర్జాలంలో పొందుపరుస్తున్నారు. కంప్యూటర్లో తెలుగు రాయడం, చదవడం చాలా సులువైన ఈ రోజుల్లో ఈ వెబ్ సైట్లు ప్రపంచవ్యాప్తంగా ఉన్న తెలుగువారికి అందుబాటులో ఉన్నాయి. తమకు తీరిన సమయంలో వీటిని ఉపయోగించుకోవచ్చు , తమ పిల్లలకు ఎన్నో విలువైన విషయాలను నేర్పవచ్చును కూడా. శతకాలు, జానపద పాటలు, మంగళహారతులు, డిక్షనరీలు, పద్యాలు, పుస్తకాలు మొదలైన అమూల్యమైన విజ్ఞానసంపదను ఈ సైట్లు నిక్షిప్తపరుస్తున్నాయి. అటువంటి ముఖ్యమైన వెబ్ సైట్లు కొన్ని పరిచయం చేసుకుందాం..


మాగంటి - http://maganti.org

నేటి బిజీ బిజీ జీవితాలలో పుస్తకపఠనం, సాహిత్యాభిలాష వగైరా చాలా వరకు తగ్గుతున్నాయి అనవచ్చు. కాని తమ తాతలు, తండ్రులు ఎంతో ఆసక్తిగా సేకరించి, భద్రపరుచుకున్న అపురూపమైన సాహిత్య సంపదను, నేటి, రాబోయే తరాలకు అందించాలనే మహోన్నతమైన అభిలాషతో , తమకు తెలిసిన విషయాలు ఇతరులతో పంచుకోవాలి, పెద్దవాళ్లు అందచేసిన పెన్నిధి దాచుకుని, తమతోనే అంతం కాకుండా తర్వాతి తరానికి అందచేయాలనే సదుద్ధేశ్యంతో మాగంటి అనే వెబ్ సైట్ ని ప్రారంభించారు శ్రీ మాగంటి వంశీ , అతని కుటుంబ సభ్యులు. తమకు వీలైనంత రీతిలో ఒక సాహిత్య భాండాగారంగా తయారుచేయాలనే ఉద్ధేశ్యంతో ఇందులో క్రమం తప్పకుండా కొత్త సమాచారం చేరుస్తున్నారు.

ఇకపోతే ఈ వెబ్ సైటులో ఏమేమి ఉన్నాయి అంటే చిన్న పిల్లలకోసం బోలెడు కథలు, పద్యాలు , వైజ్ఞానిక వ్యాసాలు, సాహితీవేత్తల, సంగీతకారుల వివరాలు, వారితో జరిపిన చర్చగోష్టీలు, జానపద కళల వీడియోలు, అవధానంలో సమస్యాపూరణ, చాటువులు వగైరా ఎన్నో ఎన్నెన్నో.. ఇంకా ఈ సైట్లో ఉన్న కళాఖండాలు ఒక్కసారి పరికిద్దాం. సాహిత్యం విభాగంలో వేదములు, ఉపనిషత్తులు, ఋత్త్వికులు , నారద సూత్రాలు... పిల్లల కోసం కూడా అరుదైన, అద్భుతమైన సమాచారం ఉంది. చిట్టి పొట్టి పద్యాలు, దీవెన పద్యాలు, జానపద కథలు, కోలాటం పాటలు వగైరా.. ఇక పురాణాల విషయానికి వస్తే పురాణాలు, అష్ట దిక్పాలకులు, శ్లోకాలు, అశ్వినీ దేవతలు, మన చక్రవర్తులు.. పొడుపు కథలు, కాలం, యుగాలు, దశవాయువులు , మహాకవులు, కవయిత్రులు, జేజిమామయ్య పాటలు.. అలాగే మహిళలకు ఎంతొ ముఖ్యమైన శ్రావణ, మంగళవార , శుక్రవార పాటలు, లాలిపాటలు, మంగళహారతి పాటలు ఎన్నో మధురమైన లలితగీతాలు కూడా పొందుపరచబడ్డాయి.


అసలు ఈ పాటలు ఉన్నాయి అని కూడా చాలామంది ఊహకు రావేమో.... టెంకిపాట - ఎంకిపాట, తిరుపతి వేంకటేశ్వర కవుల పకోడీ పద్యం, మల్లినాధసూరిగారి ఆవకాయ పాట, దోమ పద్యాలు, దేవులపల్లివారి పేరడీ పాట, పేకాట పాట.. ఇలా ఎన్నో అపురూపమైన పాటలు మీగడతరకలుగా ఈ సైట్ లో ఉన్నాయి. అంతేకాక చమత్కార చాటువులు, మేలుకొలుపులు, గాజులయ్య పాట, పెళ్లి పాట, రోకటిపాట, దంపుళ్ల పాట, గోంగూర పాటలూ ఉన్నాయి. మరుగునపడిపోతున్న ఎన్నో జానపదకళల వీడియోలు కూడ ఈ సైట్లో మనం వీక్షించవచ్చు. చెంచు నాటకం, కీలు గుర్రం, యక్షగానం, చెక్కబజన, పగటి వేషాలు, గంగిరెద్దుల పాటలు మొదలైనవి..



ఆంధ్రభారతిhttp://andhrabharati.com


ప్రస్తుతం సాహిత్యాభిమానులకు , పురాణాలు చదవాలనే అభిలాష గలవారికి అనువైన గ్రంధాలు అందరికీ అందుబాటులో లేవు. ఉన్న కొద్దిపాటి గ్రంధాలు గ్రంధాలయాలలో నిక్షిప్తమై ఉన్నాయి. అందరూ గ్రంధాలయానికి వెళ్లి చదవడానికి సమయం, ఓపిక ఉండదు. ఈనాడు ప్రపంచవ్యాప్తంగా అంతర్జాలం విస్తృతంగా ఉపయోగించబడుతుంది. పురాణాలు, శతకాలు వగైరా ఉత్తమ సాహిత్యాన్ని , అందరికీ అందుబాటులొ ఉంచడానికి జరిగిన విశేష కృషిఫలితమే "ఆంధ్రభారతీ” సైటు.


ఇది ఒక సైటు అనడంకంటే ఒక విజ్ఞానపుగని అనవచ్చు. భాషకు సంబంధించి వ్యాకరణం, చందస్సు, అలంకారాలు, జాతీయములు, పొడుపుకథలు...చరిత్రకు సంబంధించి పూర్వ, మధ్య, ఉత్తర మధ్య, ఆధునిక యుగ చరిత్రలు, పుణ్యక్షేత్రాలు, ఇతిహాసాలు,శతకాలు, కవితలు ..ఇలా చెప్పుకుంటూ పోతే తరగని నిధి మన కందుబాటులో ఉంటుంది. అలాగే ప్రసిద్ధమైన నాటకాలు, అలనాటి ప్రముఖుల గురించిన విశేషాలు ఈ వెబ్ సైటులొ పొందుపరచబడ్డాయి. కన్యాశుల్కం, చింతామణి వంటి నాటకాలు కూడా ఈ సైటులో లభ్యమవుతున్నాయి. మనం ఎన్ని పుస్తకాలు కొనడానికి ప్రయత్నించినా ఇక్కడ ఉన్న నిధిలో కొంతవరకైనా సమకూర్చుకోలేమేమో ? అనిపిస్తుంది. ఆంద్రభారతిలో కొత్తగా నిఘంటువు కూడా చేర్చబడింది. మనకు తెలియని పదాలు వాటి అర్ధాలను వివిధ శబ్దరత్నాకరాల నుండి సులువుగా వెతికే వీలు కల్పిస్తున్నారు..

Wednesday, April 6, 2011

అంతర్జాలంలో సగం... మనస్వి

అంతర్జాలంలో సగం..

మనసులోని భావాలను, ఆలోచనలను పంచుకొని వాటిని చర్చించుకోవడానికి అద్భుతమైన వేదిక బ్లాగు. ఇంటికో ఇంజనీరు తయారవుతున్న ఈ రోజుల్లో కంప్యూటర్, ఇంటర్నెట్ వాడకం నిత్యావసరమైపోయింది. తెలుగులో రాయడం సులువు కావడంతో తెలుగుబ్లాగులు కూడా విస్తృతి చెందాయి. అన్నింట్లోనూ మేమున్నాం అంటూ మహిళలు కూడా తెలుగు బ్లాగులలో తమకంటూ ఒక ప్రత్యేకతను ఏర్పరుచుకొని బ్లాగును తమ ఆలోచనలకు వేదికగా చేసుకుని ఇంటిపనులు చేసినంత సులువుగా కంప్యూటర్‌ను కూడా అలవోకగా ఉపయోగిస్తున్నారు. వైవిధ్యమైన రాతలతో పాఠకులను అలరిస్తున్నారు. కథలు, హాస్యం, కవితలు, పాటలు, వంటలు, చలొక్తులు, చర్చనీయాంశాలు.. ఇలా కాదేదీ తమ రాతలకనర్హం అని నిరూపిస్తున్నారు. అందుకేనేమో వేలల్లో ఉన్న తెలుగు బ్లాగుల్లో పదుల్లో ఉన్న మహిళాబ్లాగులు రాశికంటే వాశి మిన్న అని నిరూపించాయి. తెలుగు భాష మీది అభిమానం, రాయాలి, తమలా ఆలోచించేవారితో పంచుకోవాలి, చర్చించాలి అనే తాపత్రయంతో ఎన్నో విభిన్నమైన సంఘటనలు, సమస్యలు తమదైన సైలిలో అందిస్తున్నారు. ఉద్యోగానుభవాలు, ఉద్వేగాలను హృద్యంగా వెల్లడి చేయడంలో మహిళలను మించినవారు లేరేమో? మహిళా బ్లాగర్లలో అందరూ సాంకేతిక నిపుణులు కారు. ఇందులో గృహిణులు, ఉద్యోగినులు, పత్రికా విలేఖర్లు, ప్రవాసాంధ్రులు, విద్యార్థినులు, ప్రముఖ రచయిత్రులు కూడా ఉన్నారు. వీరికి వయసు పరిమితి కూడా లేదు. పాతిక నుండి ముప్పాతిక ఏళ్లవరకు ఉన్న మహిలా బ్లాగర్లు ఎంతో ఉత్సాహంగా, హాస్యపూరకంగా, వ్యంగ్యంగా, సూటిగా, ఘాటుగా ఔరా అనిపిస్తూ తమ రాతలకు వన్నెలద్దుతున్నారు. వీరిలో సమయం కుదిరినప్పుడు రాసేవారు కొందరు, ఏదైనా విషయం తక్షణం పంచుకోవాలి అనుకున్నవెంటనే బ్లాగులొ రాసుకునేవారు కొందరు. తమ రాతల ద్వారా తమ భావాలను, ఆలోచనలను, ప్రతిభను ప్రదర్శిస్తూ, మెరుగు పెట్టుకుంటూనే కొత్త విషయాలు నేర్చుకోవడానికి ఎల్లవేళలా ఉత్సుకత చూస్తున్నారు మహిళలు. వీరందరూ తమ వృత్తితో పాటు బ్లాగింగును కూడా ఉపయుక్తమైన ప్రవృత్తిగా సమర్ధవంతంగా నిర్వహిస్తున్నారు.



ఊరికే తమకు తోచినప్పుడు బ్లాగు రాయడమే కాక కొందరు ఔత్సాహికులైన మహిళా బ్లాగర్లు కలిసి తమకంటూ "ప్రమదావనం" అని ఆంతరంగిక గుంపు ఏర్పాటు చేసుకున్నారు. వివిధ దేశాల్లో ఉన్న మహిళా బ్లాగర్లు ఇక్కడ కలిసి సరదాగా కబుర్లు చెప్పుకుంటూ, సాంకేతిక సలహాలు, సందేహాల నివృత్తి చేసుకుంటారు. అప్పుడప్పుడు ప్రత్యేకమైన రోజులలో సభ్యులందరూ కలిసి ఒకే అంశంపై ఒకే రోజు తమ బ్లాగులో టపాలు రాసి హడావిడి చేసేస్తారు. అవి తమకు నాకు నచ్చిన పాట కాని, చేట్టు కథ కాని, కృష్ణాష్టమి కాని, వాన గురించి కాని కావొచ్చు. ప్రమదావనం సభ్యులు బ్లాగులు రాసుకోవడం, కబుర్లాడుకోవడమేగాక సమాజానికి తమ వంతుగా ఏదైనా సాయం చేయాలనే సదుద్ధేశ్యంతో స్వచ్చందంగా ధనసేకరణ చేసి వీలైనప్పుడు సహాయ కార్యక్రమాలు చేస్తుంటారు. అనాధలైన ఆడపిల్లలకు దుస్తులు, పుస్తకాలు వగైరా, మానసిక వికలాంగులైన స్కూలు పిల్లలకు అవసరమైన కుర్చీలు, ఆహార వస్తువులు, వృద్ధాశ్రమాన్ని సందర్శించి వాళ్లకు నెలసరి భోజన సామగ్రి, దుస్తులు, చెప్పులు, కొన్ని నిత్యావసరమైన వస్తువులు ఇచ్చి వారితో కొన్నిగంటలు గడిపారు. అంతే కాక నిలువనీడలేక చలికి వణుకుతూ ఫుట్‌పాత్‌ల మీద పడుకునే పేదవారికి దుప్పట్లు అర్ధరాత్రివేళ వెళ్లి దుప్పట్లు కప్పడం, వరదబాధితులకు, అనాధపిల్లలకు ధనసహాయం వంటివి చేస్తున్నారు. ఈ సేవాకార్యక్రమాలతో మిగతావారికి స్ఫూర్తినిస్తున్నారు.



అంతర్జాలంలో మహిళా బ్లాగర్లు బ్లాగింగును చక్కని అభిరుచిగా పెంపొందించుకుంటున్నారు. కాని తమ బ్లాగు నిర్వహణతోపాటు కొన్ని జాగ్రత్తలు తప్పకుండా తీసుకోవాలి. తమ వ్యక్తిగత వివరాలు, ఫోటోలు, చిరునామాలు బ్లాగులో, అంతర్జాలంలో ఎక్కడా కూడా ఇవ్వకూడదు. వివాదాస్పద అంశాలకు దూరంగా ఉండడమే మంచిది. తమ బ్లాగులో అభ్యంతరకరమైన వ్యాఖ్యలు రాకుండా తగిన జాగ్రత్తలు పాటించాలి. సాంకేతిక పరిజ్ఞానం చాలా ప్రయోజనకరమైనది. అలాగే కొద్దిగా అజాగ్రత్తగా, ఏమరుపాటుగా ఉంటే తీరని నష్టాన్ని, బాధను కూడా కలిగిస్తుంది. అందుకే వాస్తవ ప్రపంచమైనా, మిధ్యా (అంతర్జాల) ప్రపంచమైనా మంచి, చెడు రెండూ ఉంటాయి. మనకు ఏది అవసరమో అదే తీసుకుంటే సరి.






మనస్వి... http://manasvi-jaya.blogspot.com/

నేను ఇంక వంట చేయను గాక చేయను. రోజూ పొద్దున్నే గృహప్రవేశం లాగా టైంకి వంటింటి ప్రవేశం చేయాలి. ఇష్టం ఉన్నా లేకున్నా అలాగే వంట చేయాల్సిందే! అబ్బా, ఈ వంట ఎవరు కనిపెట్టారో కాని.... ఇళ్ళల్లో వంటిల్లు కట్టట్టం బాన్ చేస్తే బాగుండు. ఎన్నో ఆధునిక పరికరాలు కనుక్కుంటున్నారు. అన్ని పనులు చాలా సులభమయ్యేట్లుగా చూస్తున్నారు. వినాశన సాధనాలు ఎన్ని కనుక్కుంటున్నారో. ప్రపంచమే ఏ నిమిషంలో అయినా అంతమయ్యేంత పరిజ్ణానాన్ని పెంచేసుకుంటున్నారు. కాని, ఒక్కరంటే ఒక్కరన్నా...అలా సులభంగా కిచన్ లోంచి చక చకా ఫుల్ మీల్ ప్లేట్స్ బయటికి వచ్చేట్లు కనుక్కోలేదు. ఇలాంటి పనికొచ్చే విషయాలు మాత్రం కనుక్కోరు. ఎందుకో, నాకిప్పుడు బాగా అర్ధమయింది. అవన్నీ కనుక్కుంటున్నది మగబుద్ధికదా!!! అందుకే ఆడవాళ్ళు ఎక్కడ సుఖపడిపోతారో అని ఇలాంటి సౌకర్యాలు మాత్రం కనుక్కోటం లేదు. ద్రౌపదికిచ్చిన అక్షయ పాత్ర నాక్కూడా, ఏమూలో, ఓ రోడ్డు మీదో దొరకచ్చు కదా...లేపోతే కళ్ళు మూసుకుని ఏదో ఒక మంత్రం చదివితేనో, మాయాబజార్ లో లాగా పంచభక్ష్య పరమాన్నాలు ప్రత్యక్ష్యమైతే ఎంత బావుండో కదా.....కనీసం ఓ కామధేనువన్నా నాకు దొరికితే బావుండు.



అని తన బాధా సప్తశతిని వెల్లబోసుకున్నారు జయ. హైదరాబాదులోని ఒక మహిళాకాలేజీలో పనిచేస్తున్న జయ మనస్వి అనే బ్లాగులో తన జీవితంలో ఎదురైన సంఘటనలు, తనకు నచ్చిన, కలవరపెట్టిన, మనసును కదిలించిన సంఘటనలను చాలా హృద్యంగా బ్లాగులో రాస్తారు. అప్పుడప్పుడు తను చూసిన సినిమా అనుభవాలే కాక ఇదిగో తాను రెగ్యులర్ గా చీరలు తీసుకునే వ్యక్తి గురించి కూడా బ్లాగులో పరిచయం చేస్తారు. ఎవరికైనా వెంకటగిరి చీరలు కావాలంటే చెప్పండి. ఈ చీరలు కట్టీ కట్టీ మా కొలీగ్స్ తో బాగా తిట్లు తింటున్నాను. ఈ చీరలకు నేను బ్రాండ్ అంబాసిడర్నట. నేనే ప్రమోట్ చేస్తున్నానట. అన్నీ అవే కడ్తున్నాను కాబట్టి నా పేరు వెంకటమ్మట. అబ్బో చాలా మాటలే పడ్తున్నానులెండి. ఎవ్వరూ నామీద కొంచమైనా జాలి చూపించట్లేదు. ఇలా అసలు ఆడాళ్లకు మాట్లాడుకోవడానికి దొరకని పనికిరాని వస్తువు, విషయం కాని ఉందా అని అనిపించక మానదు జయ బ్లాగు చదువుతుంటే. మనస్వి బ్లాగులో ఆలొచన,ఆవేశం,ఆవేదన మాత్రమేకాక అందమైన కవితలు, చిత్రాలు కూడా ఎన్నొ ఉన్నాయి.

మనస్వి...వినీల గగనపు వేదికపై నే పాడిన జీవనగీతం అంటూ ఆహ్వానిస్తున్నారు హైదరాబాదుకు చెందిన జయ..

Blogger template 'YellowFlower' by Ourblogtemplates.com 2008