నాకిదే టైం పాస్ ....

ఈ రోజు ఆంధ్రజ్యోతి దినపత్రిక నవ్య విభాగంలో వచ్చిన నా వ్యాసం... ఈ లింకు మంటనక్కలో కంటే ఎక్స్ ప్లోరర్^లో చూడండి.

"మీనాంటీ ! ఉన్నారా? కప్పుడు పంచదార ఉంటే ఇస్తారా?"

.

" ఏవమ్మో! ఆంటీ ఏంటీ ? తెలుగులో ఎంచక్కా అత్తా అనో, అక్కా అనో అన్లేవా? అమెరికా ప్లేన్ దిగి వచ్చిన దొరసానిలా ఆంటీ ఏంటి? నీ ఇంగిలిపీసు మండిపోను. ఐనా మా అమ్మా, అయ్య ఆ మధురమీనాచ్చిలా అందంగా పుట్టానని మీనాక్షి పని పేరు పెడితే అందరూ మరీ బద్ధకించి ఆ పేరుని కత్తిరించి మీనా అని పలికేస్తున్నారు. మరీ నాజూకు ఐపోతున్నారు జనాలు. ఇదిగో పంచదార. మళ్ళీ నువ్వు కొనగానే తిరిగిచ్చేయాలి సుమా. ఇచ్చి మర్చిపోవడం అంటే నాకు మా చెడ్డ చిరాకు. ఈ పనిమనిషి ఎప్పుడొచ్చి చస్తుందో. మహారాణిలా వస్తుంది. మొగుళ్ళకోసం ఆత్రంగా ఎదురుచూసే రోజులు పోయి ఈ పనిమనుషులకోసం ఎక్కువ ఆత్రంగా ఎదురుచూడాల్సిన కాలం వచ్చింది. ఏం కలి కాలమో ఏమో?

.

ఓరేయ్ పిల్లలు! లెగండి. రోజూ ఇదో తంతు ఐపోయింది. ఇంత పెద్దాళ్లయ్యారు. ఇంకా రోజూ నిద్ర లేపాలి. ఎలా బాగు పడతారో ఏమో. ఒరేయ్ కిట్టు. లే.. రాత్రంతా ఆ పనికిరాని క్రికెట్ మ్యాచులు చూడడం. పొద్దున ఆలస్యంగా లేవడం. ఆ మ్యాచులవల్ల వాళ్ళకు లక్షలు,కోట్లు వస్తాయి. మరి నీకు వచ్చేది సున్నాలే. లే.. శిల్పా .. ఆడపిల్లవన్నట్టే కాని ఒక్క పని నేర్చుకోదు. ఎప్పుడు చూసినా ఆ సెల్ ఫోన్ మాట్లాడటం. తిండి లేకున్న ఉంటారేమోగాని ఈ సెల్ ఫోన్ లేకుండా రోజులు గడిచేటట్టు లేవు. గంటలు గంటలు ఏం ముచ్చట్లు పెడతారో ఏమో. బిల్లు అవుతుందా అంటే ఫ్రీ ఆఫర్‍లు అంటారు. ఈ పిల్లలు సెల్ కంపెనీ వాళ్ళను ముంచేస్తారు. అసలు ఈ సెల్ ఫోన్ కనిపెట్టినవాడిని తన్నాలి. ఏవండి. లేచారా లేదా? ఆలస్యంగా లేవడం మళ్ళీ ఆఫీసుకు లేట్ అయిందని లారెన్స్ లా డాన్స్లలాడటం. అసలు వీళ్ళందరి చదువులు , ఉద్యోగాలు నేను చేస్తే సరి. అనవసరంగా రోజు అరిచేకన్నా.

.

ఒసే సరూప. ఇదేనా రావడం? నువ్వు పని చేసేందుకు నేను నీకు డబ్బులిస్తున్నానా? నువ్వు నాకిస్తున్నావా? నీ ఇష్టమొచ్చినప్పుడు వస్తావు. నాకంటే నీ పనే నయంగా ఉంది. సినిమాలు, పండగలు, జ్వరాలు అన్నీ వస్తాయి. మాకు ఎగనామం పెడతావు. జీతం కోయొద్దంటావ్. నువ్వు వచ్చినా, రాకున్నా ఈ ఇంటికి గొడ్డూ చాకిరి చేస్తున్నా ఎవ్వరూ అయ్యో అనరు. జీతం లేదు, సెలవు లేదు. చీ! ఎదవ జన్మ..

.

అమ్మయ్యా! ఇప్పుడు కాస్త తీరిక దొరికింది . ఈ పేపర్ చదివి, కొద్ది సేపు టివి చూస్తే సరి. ఏం పేపర్లో, ఏం టివినో. ఇక్కడ చదువుదామంటె ఒకరి మీద ఒకరు తిట్టుకొవడం, పనికిమాలిన విషయాలు మధ్యలో ఈ రాజకీయనాయకుల గోల. ఎలక్షన్లముందు అమ్మా! అయ్యా ! అక్కా ! తమ్మి! అని మర్యాదరామన్నకి మేనత్త కొడుకుల్లా మన చుట్టూ తిరుగుతారు. గెలిచాక నాలుగేళ్ళు కనపడరు. ఎన్నికల ముందు ఊళ్ళు తిరిగి, జనాలకు అడ్డమైన కబుర్లు చెప్పి, కరెంట్ ఫ్రీ అని గెలిచి ఇప్పుడు మా వల్ల కాదు. కరెంట్ కట్ తప్పనిసరి ,మీరే ఆ వరుణదేవుడిని ప్రార్ధించుకోండి అంటారు అసలు ఈ మధ్యతరగతి వాళ్ళ రాత మారేనా? పప్పులు, బియ్యం , గ్యాసు, కూరగాయలు ఏది కొనాలన్నా మండిపోతుంది. సరే అని టీవీ చూద్దామంటే అర్ధం కాని సీరియళ్ళు, అడ్డమైన పోటీలు. అస్సలు అవి డాన్సు ప్రోగ్రాములా, క్లబ్ డాన్సులా? పిల్లలు, పెద్దలు కలిసి చూసేలా ఉన్నాయా? ఇవన్నీ ఎవరు పట్టించుకోరు. అసలు ఈ పిల్లల తల్లితండ్రులకు ఏం మాయరోగం వచ్చిందో. ఆ పిల్లలను సగం సగం బట్టలతో డాన్సులేయిస్తారు. పైగా అది లక్షలాది మంది చూస్తున్నారన్న ఇంగితజ్ఞానం ఉండదు. ముందు వీళ్ళను ఉతకాలి. ఇక అత్తాకోడళ్ళ సీరియళ్ళు చూస్తే జీవితం మీద విరక్తి కలుగుతుంది. ఈ సీరియళ్ళలోని ప్లానింగులు ఆ బిన్ లాడెన్, బుష్ లకు కూడా రావేమో!.. కనీసం ఆ హిందీ సీరియళ్ళు చూద్దామా? అంటే అదో అయోమయ లోకం. మనవళ్ళకు పెళ్ళీడు పిల్లలున్నా, బామ్మలు, తాతలకు ఒక్క తెల్ల వెంట్రుక రాదు. మొహాన ఒక్క ముడత ఉండదు. లేదంటే కొన్ని కథలు ఒక జన్మ సరిపోదన్నట్టు మరో జన్మకు సాగదీస్తారు. పాటల చానెళ్ళు చూద్దామా. దురదగుంటాకు రాస్టే ఎగిరినట్టు పిచ్చి గంతులు. పిచ్చాళ్ళలా అర్ధంపర్ధం లేని పాటలు. చూసేవాళ్ళు ఎదవలైతే ఇలాంటి సినిమాలూ , సీరియళ్ళూ వస్తాయి.

.

అమ్మో! చూస్తుండగానే సాయంత్రమైంది. పిల్లలొచ్చే టైమ్ అయింది. రాత్రి వంట చేయాలి. ఏ పాటు తప్పినా సాపాటు తప్పదు కదా . గానుగెద్దులా అయింది బ్రతుకు. రోజు వంట చేయడం, ఇల్లు సర్దడం, పిల్లలను తయారుచేయడం, చదివించడం, మొగుడికి కావలసినవి అందించడం.ఒక గుర్తింపు లేదు పాడులేదు. నచ్చకుంటే బాగాలేదని అనడం తెలుసు కాని, బాగున్నప్పుడు నోరు తెరచి బాగుంది . బాగా చేసావు అని మాత్రం అనరు మొగుడైనా, పిల్లలైనా. అయ్యో అని అందరికి అనుకూలంగా అందిస్తుంటే ఏమీ తెలీడంలేదు. ఒకసారి తిక్కరేగిందా.స్ట్రైక్ చేసానంటే రోగం కుదురుతుంది. ఐనా ఇది జరిగేనా . చచ్చేనా. నాలో నేను సణుగుతూ పని చేసుకోక తప్పదు.. ప్చ్. ..

.

పక్కింట్లో జంటను చూసే ముచ్చటేస్తుంది. కాని బాధ కలుగుతుంది కూడా. ఇద్దరూ కంప్యూటర్ ఇంజనీర్లు. మంచి ఉద్యోగాలు. వేలల్లో ఉద్యోగాలు . ఏం లాభం. కూలీలలాగా పని చేస్తారు. ఒక ముద్దు లేదు, ముచ్చట లేదు. పని చేయడం, వచ్చి పడుకోవడం. కడుపునిండా తింటారో లేదో అర్ధం కాదు. కలిసి కాఫీ తాగడానికి శనాదివారాలు తప్ప కుదరదు. . పాపం.

.

ఒరే పిల్లలు , మీ చదువులు ఐపోతే , ఇక వచ్చి తినేసి పడుకోండి. ఇంకా అయ్యగారు ఇంటికి ఎప్పుడొస్తారో. పేకాట రామాయణం ఇంకా పూర్తికానట్టుంది. ఏమంటే. టైమ్ పాస్ అంటారు. మరి నాకు టైమ్ పాస్... ఈ సణుగుడేనా?

.

జ్యోతి వలబోజు.