Wednesday 9 September 2009

ప్రేమ ఎంత మధురం...



ప్రేమ అనేది అర్ధం చెప్పలేని అనుభూతి .. ఇది యవ్వనంలో ఉన్నవారి మధ్యే కాదు ఎవరికైనా కలుగుతుంది. సృష్టిలోని ప్రతి వస్తువు, మనిషిని ప్రేమించగలగడం అనేది ఒక అద్భుతమైన వరం. కాని నేటి యువతరానికి ప్రేమ అంటే ఆకర్షణ, శారీరక సంబంధం అనుకుంటారు, అలనాటి పాత తరంలోని వారికి ప్రేమ అంటే ఒక బూతు మాట, అక్రమ సంబంధం అంటారు.కాని ఇద్దరు వ్యక్తుల మధ్య ప్రేమ, లవ్ అనేది అనిర్వచనీయమైనది. దానికి పరిమితులు,హద్దులు ఉండవు..
ఇక వయసులో ఉన్నవారు ప్రేమలో పడితే వాళ్లకు అన్నీ అపురూపమే. చెలి/చెలికాడు తోడుంటే ప్రకృతి ఆంతా రమణీయమే..



అసలు అమ్మాయిలు చాలా అమాయకులు. బుద్దిగా చదువుకుంటూ ఉంటారు.కాని తెలివైన అబ్బాయిలు చదువుకున్న అందమైన అమ్మాయిని మాటల్లో పెట్టి ,ప్రేమ బుట్టలో పడేస్తారు. అన్ని సుగుణాలు ఉన్న ఆ ఇంతిని తెలివిగా ప్రేమించి, తమని ప్రేమించేలా చేసుకుని జీవిత భాగస్వామిని చేసుకుంటారు. ఇది నిజం.. ఆ ప్రేమ కలకాలం చెక్కు చెదరకుండా ఉంటే ఎంతో మేలు .. అదే నిజమైన ప్రేమ, ఆకర్షణ కాదు. అసలు ఆ అమ్మాయి ఒప్పుకోవడానికి మొదట్లో కాస్త తటపటాయిస్తుంది. ఆ అబ్బాయి ఎందువల్ల గొప్పవాడు అని ఆలోచిస్తుంది. పాపం అబ్బాయి తను ఎంత గాడంగా ప్రేమించేది తెలియజేయడానికి ఎన్నో తిప్పలు పడాల్సి వస్తుంది.. తప్పదు కదా..


ఈ సోదంతా ఎందుకు అంటారా??


సాధారణంగా నాకు పాత పాటలే ఇష్టం.మంచి సాహిత్యం,సంగీతం, స్వర మాధుర్యం ఉంటాయని. ఇప్పుడు వస్తున్నా పాటల్లో అన్నీ గానా బజానాలు, చెవులు దద్దరిల్లే సంగీతం, అర్ధం కాని సాహిత్యం లేదా అర్ధమంటూ లేని సాహిత్యం. కొన్ని పాటలు వింటే మనసు పులకరిస్తుంది. ఉల్లాసంగా , ఉత్సాహంగా ఉంటుంది. మరి కొన్ని పాటలు వింటే చిరాకు, కోపం వస్తుంది.వాటికంటే రైల్లో పిల్లలు పాడే పాటలు మేలు అనిపిస్తుంది. కాని ఈ మధ్య ఒక పాట నాకు తెగ నచ్చేసింది. లేటెస్ట్ సినిమా "మగధీర"లోని పంచదారా బొమ్మ.. సినిమాలోని మిగతావిషయాలు పక్కన పెడితే ఈ పాటలో సాహిత్యం, సంగీతం , నూతన గాయకుడి స్వరం చాలా బావున్నాయి. సినిమా కూడా సినిమాలా చూస్తె పర్లేదనుకోండి.


ఈ పాటలో ప్రియుడు చేసిన అల్లరికి ప్రేయసి అలిగి ముట్టుకోవద్దంటే అతడు గోముగా బ్రతిమాలతాడు.



పంచదారా బొమ్మా బొమ్మా పట్టుకోవద్దనకమ్మా
మంచుపూలా కొమ్మా కొమ్మా ముట్టుకోవద్దనకమ్మా
చేతినే తాకొద్దంటే చెంతకే రావొద్దంటే
యేమవుతానమ్మా
నిన్ను పొందేటందుకె పుట్టానే గుమ్మ
నువ్ అందకపోతే వృధా యీ జన్మ



పువ్వు పైన చెయ్యేస్తే కసిరి నన్ను తిట్టిందే
పసిడిపువ్వు నువ్వని పంపిందే
నువ్వు రాకు నా వెంట
ఈ పువ్వు చుట్టు ముళ్లంటా
అంటుకుంటే మంటే వొళ్లంతా



తీగపైన చెయ్యేస్తే తిట్టి నన్ను నెట్టిందే
మెరుపు తీగ నువ్వని పంపిందే
మెరుపు వెంట ఉరుమంటా .. ఉరుము వెంట వరదంటా
నే వరద లాగా మారితే ముప్పంటా
వరదైనా వరమని వరిస్తానమ్మా
మునకైనా సుఖమని వుడేస్తానమ్మా
నిన్ను పొందేటందుకె పుట్టానే గుమ్మ
నువ్ అందకపోతే వృధా యీ జన్మ



గాలి నిన్ను తాకింది నేల నిన్ను తాకింది
నేను నిన్ను తాకితే తప్పా
గాలి ఊపిరయ్యింది నేల నన్ను నడిపింది
ఏమిటంట నీలోని గొప్ప
వెలుగు నిన్ను తాకింది చినుకు కూడ తాకింది
పక్షపాతమెందుకు నాపైన
వెలుగు దారి చూపింది చినుకు లాలి పోసింది
వాటితోటి పోలిక నీకేలా



అవి బ్రతికున్నప్పుడే తోడుంటాయమ్మా
నీ చితిలో తోడై నేనొస్తానమ్మా
నిన్ను పొందేటందుకె పుట్టానే గుమ్మ
నువ్ అందకపోతె వృధా యీ జన్మ


ఆ ప్రియుడికి ఎంత ధీమానో ఈ అందాల గుమ్మని పొందేటందుకే పుట్టి తను దక్కకుంటే తన జన్మ వృధా అంటున్నాడు. అమ్మాయి మాత్రం తక్కువ తిందా. ముందు హెచ్చరిస్తుంది పువ్వు లాంటి నా చుట్టూ ముల్లుంటాయి. అవి అంటుకుంటే ఒళ్ళంతా మంటలు జాగ్రత్త అని. నువ్వు నన్ను మెరుపు తీగ అంటున్నావు. బావుంది. కాని మెరుపు వెంట ఉరుము, దాని వెంట వరద రాక తప్పదు కదా.నేను వరదలాగా మారితే నీకే ముప్పు అని వారిస్తుంది. అబ్బాయ్ ఊరుకుంటాడా? నువ్వు వరదైనా వరంగా భావించి అందులో మునిగిపోతాను అంటాడు. ఇంకా ముట్టుకోవద్దని దూరంగా వెళుతున్న భామని గోముగా అడుగుతున్నాడు. "గాలి, నేల, చినుకు , వెలుగు నిన్ను తాకితే లేనిది నేను తాకితే తప్పా?" గాలి ఊపిరయ్యింది, నేల నన్ను నడిపించింది, వెలుగు దారి చూపింది,చినుకు స్నానం చేయించింది.వీటన్నింటికంటే నువ్వేంటి గొప్ప. వాటితో నీకెందుకు పోలిక అని ఎదురు ప్రశ్నించింది. ఇక్కడ అతను చెప్పిన మాట మాత్రం అద్భుతమైనది.. ప్రతి అమ్మాయి ఇలాంటి మాటనే తన ప్రేమికుడి నుండి కోరుకుంటుంది కదా.. " అవి బ్రతికున్నప్పుడే తోడుంటాయమ్మా
నీ చితిలో తోడై నేనొస్తానమ్మా".. ఇదే ధైర్యం, రక్షణ, ప్రేమ ప్రతి స్త్రీ తన భాగస్వామినుండి కోరుకుంటుంది. పంచభూతాలకంటే ఎక్కువగా తోడుండే వ్యక్తి జీవిత భాగస్వామి కదా.. అది ప్రేమ, ఆప్యాయత,అనురాగాలతో నిండి ఉండేలా చూసుకోవడం మన బాధ్యత..

ఈ పాటలో నటీనటులకు నేను ప్రాధాన్యం ఇవ్వడంలేదు. సంగీతం, సాహిత్యం, గాయని, గాయకుల స్వర మాధుర్యం..

చిత్రం : మగధీర
గానం : అనుజ్, రీటా
రచన : చంద్రబోస్
సంగీతం : ఎం.ఎం.కీరవాణి

5 వ్యాఖ్యలు:

Padmarpita

"అవి బ్రతికున్నప్పుడే తోడుంటాయమ్మా
నీ చితిలో తోడై నేనొస్తానమ్మా" ఇదిదొక్కటి చాలు పాటమొత్తాన్ని హైలైట్ చేస్తుందండి....

పరిమళం

పద్మార్పితగారి మాటే నాదీనూ ...

sreenika

ప్రస్తుతం వస్తున్న సినిమా పాటల్లో సాహిత్యం కొరవడింది..అనే వారికి ఇది ఒక కనువిప్పు.
అవకాశం వస్తే ఎవరైనా చక్కటి సాహిత్యాన్ని అందించడానికి ఇష్టపడతారు.

కొత్త పాళీ

ఈ పాట పిక్చరైజేషను కూడా బానే ఉన్నట్టు గుర్తు

Souju

Chakkati sahithyam, picturisation of the song, kani badha enti ante - Same lyricist wrote "ringa-ringa" song!!

I just wish producers use the talent in a right way.

Post a Comment

Blogger template 'YellowFlower' by Ourblogtemplates.com 2008